Актриса Додо Чоговадзе саноқли фильмларда рол ўйнаган бўлса-да, “Аловуддиннинг сеҳрли чироғи” фильмидаги малика Будур роли туфайли кинода ёрқин из қолдирди. Ушбу фильм чиққандан сўнг, 15 ёшли актриса тезда машҳурликка эришди: мухлислар унга хат ёзишни бошлади, йигитлар турмуш қуришни таклиф қилишди. Бироқ у кейинроқ театрдаги ҳамкасбига турмушга чиқди. Ажрашгандан сўнг эса оилавий ҳаётдан кўра ёлғизликни афзал кўрди.
Додо Чоговадзе Тбилисида агроном Александр Чоговадзе оиласида туғилган. Болалигидан у рақсга қизиқади, бу уни аввал хореография мактабига, кейин эса фильмга олиб келади. 5 ёшида у биринчи марта “Манана” фильмида кичик рол — мактаб спектаклидаги рассом ролини ўйнаган.
Шундан сўнг Додо Чоговадзе кўпинча кичик ролларга таклиф қилинади. Дебютидан 5 йил ўтгач, у “Кичик рицарлар” фильмида бош ролни ижро этади. Станислав Ростоцкий унинг истеъдодини пайқаб, унга “Замонамиз қаҳрамони” фильмидаги Бела ролини таклиф қилади. Бироқ Додонинг атиги 13 ёшда эканлигини билгач, режиссёр фикридан воз кечади.
Бироқ кастингларидан сўнг фотосуратлар Горкий киностудияси кабинетида қолиб кетади. Бир йил ўтгач, Додо яна кастингга чақирилади ва у Борис Рицаревнинг “Олуддиннинг сеҳрли чироғи” фильмидаги малика Будур ролига тасдиқланади.
Қизнинг суратга олиш майдончасида унга ҳамроҳ бўлган онаси режиссёрга қизи 15 ёш бўлса-да, тез орада 16 га тўлишини айтади. Онаси ҳам суратга олиш жараёнида иштирок этгани учун киностудиядан маош олган.
Фильм устида ишлаётганда ёш Додо Чоговадзега бутун суратга олиш гуруҳи фаол ёрдам беради. Додо баланд дарвозадан йиқилиб тушганида, суратга олиш дарҳол тўхтатилади ва шифокор актрисани кўрикдан ўтказгандан кейингина, режиссёр унга дублёр керак деган қарорга келади.
Суратга олиш жараёнини 3 ойда якунлаш режалаштирилган эди, бироқ белгиланган муддат ўтиб кетади. Сентябрь ойида ўқув йили бошланганда Додо Ялтадаги кечки мактабга қатнай бошлайди. Унга асосий актёр Борис Бистров ҳамроҳлик қилади. У шунингдек, қизга ғамхўрлик қилиб, уни қўллаб-қувватлайди ва турли муаммолардан ҳимоя қилади.
Бироқ 15 ёшли Додо Борис Бистровни севмасди. Унинг бутун эътибори костюмлар дизайнери Константин Загорскийга қаратилганди. Бу беғубор туйғу бўлганини актриса илиқ хотиралар билан эслайди.
Суратга олиш ишлари тугагандан сўнг Додо Чоговадзе хореография мактабига қайтади — унинг машҳурлиги синфдошлари билан муносабатларига таъсир қилмайди. Бироқ баъзи ўқитувчилар уни киноя билан “Голливуд юлдузи” деб аташади. Актриса йигитлардан севги изҳор қилинган минглаб мактублар олган бўлса-да, у Палиашвили опера ва балет театрида ишлай бошлаганидан кейингина ҳақиқий севгисини топади.
Театрда Додо мусиқачи ва қўшиқчи Девид Шушанин билан танишади. Уларнинг яқин муносабатлари гастрол пайтида бошланади. Қайтганларида эса Девид Додога турмуш қуришни таклиф қилади.
Бироқ оилавий ҳаёт Додо тасаввур қилган идеалдан узоқ бўлиб чиқади. Кўп ўтмай Девид Дододан театрни ташлаб, ўзини уйга ва қизи Нинони тарбиялашга бағишлашни талаб қилади. Эр-хотин Девиднинг қариндошлари билан бирга яшаган ва Додо, барча уринишларига қарамай, ҳар доим айбдор бўлиб қолган. Қайнона ўғлини ҳар қандай шароитда ҳам қўллаб-қувватлашини дарҳол маълум қилади.
Дастлаб Додо оиласини сақлаб қолишга уринади, бироқ унинг барча уринишлари бесамар кетади. Аммо актриса можаролардан чарчайди ва ажрашишга қарор қилади. Ажралишга қарамай, уларнинг муносабатлари яна 10 йил давом этади. Девид Шушанин Додо яшаган ота-онасининг уйига доимий бориб туради. Иккинчи марта уйланганидан кейин ҳам у собиқ хотини биалм муносабатларини узмайди. Охир-оқибат Додо барчасига нуқта қўйганида ҳайратда қолади.
Додо иккинчи марта турмушга чиқиши мумкин эди, лекин у ҳаммани рад этади. Додо Чоговадзе “Аловуддиннинг сеҳрли чироғи” фильмидан сўнг, фақатгина “Тунги жодугарлар” фильмида рол ўйнайди.
Изоҳ (0)