Сурхондарёда кадастр ҳужжатларини расмийлаштириб беришни ваъда қилган муҳандис ва сохта кадастр ходими ушланди

Сурхондарёнинг икки ҳудудида кадастр ҳужжатларини расмийлаштириб беришни ваъда қилган муҳандис ва сохта кадастр ходими ушланди, деб хабар бермоқда Прокуратура департаменти. 

Унга кўра, Бош прокуратура ҳузуридаги департаментнинг Денов туман бўлими томонидан тезкор тадбир ўтказилган. Кадастрлар палатаси Денов тумани филиали муҳандиси Ў.Н. фуқаро А.Н.нинг ишончига кирган. Унинг акасига тегишли уй-жойнинг кадастр ҳужжатларини 2000 АҚШ доллари эвазига расмийлаштириб беришини айтиб, 1800 АҚШ доллари ва 2,5 млн сўм олган вақтида ашёвий далиллар билан ушланган.

Шу каби департаментнинг Сурхондарё вилоят бошқармаси томонидан ўтказилган тезкор тадбирда ўзини гўёки Қумқўрғон тумани кадастр бўлими ходими сифатида таништирган фуқаро Ф.Б. фуқаро Х.П.нинг ишончига кириб, унинг Қумқўрғон тумани “Мехрабод” маҳалласида жойлашган уй-жойинг кадастр ҳужжатларини расмийлаштириб бериши эвазига 11 млн сўмни олган вақтида ашёвий далиллар билан ушланган. 

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.