Хитой ва Россияга қарашли ҳарбий самолётлар 24 июль куни АҚШнинг Аляска штати томонга қараб парвозни амалга оширган. Бу ҳақда Reuters нашри хабар берди.
Чоршанба куни Аляска ҳаво мудофааси бошқармаси штатга яқинлашаётган объектларни пайқаган. Кўп ўтмай эса ғарбий ҳудудда ҳаво радарлари ишлаб кетган.
Радарлар яқинлашаётган объектлар Россия ва Хитойга тегишли иккита ҳарбий самолёт эканини кўрсатган. Бунга жавобан АҚШ армияси қирувчи самолётларини ҳавога кўтарган.
АҚШ ҳарбийлари фаоллашувидан кейин икки давлат самолётлари ўз йўналишини фаол ўзгартирган. АҚШ ҳудудидан узоқлашиб, халқаро ҳаво ҳудуди бўйлаб учган.
“Россия ва Хитой самолётлари халқаро ҳаво ҳудудида қолди ва Америка ёки Канада суверен ҳаво ҳудудига кирмади. Томонлар ўртасида кескинлик юзага келмади”, дейилади Шимолий Америка аэрокосмик мудофаа қўмондонлиги баёнотида.
АҚШ ҳарбийлари самолётлар таҳдид сифатида кўрилмаганини билдирган, чунки улар асосан тартибли нишонларни ура оладиган эски намунадаги ҳарбий самолётлар бўлган. Вашингтон маъмурияти Шимолий Америка яқинидаги “рақобатчилар фаолиятини” мунтазам кузатишда давом этишини билдирган.
Маълумот ўрнида, жорий йилнинг 21 июль куни АҚШ стратегик бомбардимончи самолётлари Россия чегаралари томон парвозни амалга оширган эди. Баренс денгизи жанубида ҳаво сигналлари ишлаб кетиши оқибатида эса Москва рақиб самолётларини қувиб чиқариш учун ҳавода манёврлар бошлаган. Шундан сўнг бомбардимончи самолётлар Россия ҳудудидан узоқлашган.
Изоҳ (0)