Польшанинг Варшава шаҳрида 26 ёшли ўзбекистонлик йигит 15 ёшли украиналик икки ўсмирга пичоқ билан ҳужум қилгани ҳақида хабар берилган эди. Унда воқеа 22 июль куни Бродно боғида содир бўлгани ва жароҳатланган ўсмирлар касалхонага ётқизилгани айтилганди.
Мазкур ҳолатга ойдинлик киритиш мақсадида “Дарё” мухбири Ўзбекистоннинг Польшадаги элчихонаси билан боғланди.
Айтилишича, боғда 4 нафар украиналик ўзбекистонлик фуқарони талон-торож қилиш мақсадида унга ҳужум қилган.
Фуқаромиз ҳужумдан тан жароҳати олган. У ўзини ҳимоя қилиш мақсадида пичоқдан фойдаланган.
Айни вақтда тергов ҳаракатлари олиб борилмоқда. Унда Ўзбекистон фуқароси айбдор эмас, аксинча, жабрланувчи сифатида иштирок этмоқда, — дея хабар бермоқда дипломатик ваколатхона.
Йигитга консуллик ҳуқуқий ёрдами кўрсатилган ва таржимон билан таъминланган.
Қўшимча қилинишича, бугун 24 июль куни Ўзбекистон фуқароси тергов эшитувидан кейин қўйиб юборилади.
Изоҳ (0)