Республикачилар партияси 21 июль куни сайлов кампаниясини тарк этган президент Байдендан Оқ уйни тарк этишни талаб қилган. Бу ҳақда BBC нашри хабар берди.
Манбада келтирилишича, кўпгина республикачилар 2024 йилги президентлик пойгасидан чиқишини эълон қилганидан кейин президент Жо Байденни тезда вазифасидан ҳам истеъфога чиқишга ва Оқ уйни тарк этишга чақирган. Байдендан президентлик ваколатлари тугашини кутмаслик, сиёсий фаолиятини якунлаш сўралган.
Республикачилар етакчилари Байденнинг сайлов пойгасидан чиқиш қарори унинг президент лавозимини қайта эгаллаш учун когнитив соғлом эмаслиги ҳақидаги фикрларни тасдиқлашини айтган. Бу масала Байденнинг ўз партияси — Демократлар ичида ҳам узоқ пайтдан бери муҳокама қилиниб келинаётган эди.
Конгрессдаги энг қудратли республикачи, Вакиллар палатаси спикери Майк Жонсон Байденни тўғридан тўғри президентликдан кетишга чақирган. Токи у сайловга номзодини қўёлмас экан, вазифасидан ҳам истеъфога чиқиши кераклиги таъкидланган.
“Модомики Жо Байден президентликка номзод бўлишга лойиқ эмас экан, у президент бўлишга ҳам номуносиб. У зудлик билан истеъфога чиқиши керак”, деган Майк Жонсон.
Байден навбатдаги сайловларда ўз номзодини қўйишдан бош тортган бўлса-да, келаси йилнинг январь ойига қадар мамлакат раҳбари сифатидаги ваколатларини сақлаб қолади. Оқ уй матбуот хизмати берган баёнотда ҳам президент истеъфога чиқмаслиги қатъий айтилган.
АҚШ ҳукумати ичида ҳам президент истеъфоси борасида кўплаб муҳокамалар бошланган. Қатор расмийлар Байден эндиликда президент, хусусан, Олий бош қўмондон вазифаларини бажара олмаслигини билдириб, “ўткир муаммолар” ва президент хатти-ҳаракатлари воситасида АҚШ обрўсига путур етказилишини олдини олишга чақирган.
Изоҳ (0)