Қашқадарё вилояти ҳокими Муротжон Азимов Кувайтнинг Gulf General Trading Co. Ltd. компанияси вакиллари билан учрашув ўтказди. Бу ҳақда “Дунё” АА хабар берди.
Маълум қилинишича, учрашувда турли соҳалардаги инвестицион лойиҳалар, жумладан, фармацевтика маҳсулотларини ишлаб чиқариш ва соғлиқни сақлаш тизимида ҳамкорлик қилиш масалалари муҳокама қилинди.
Кувайтлик инвесторлар Қашқадарё вилоятида фармацевтика маҳсулотларини ишлаб чиқаришни йўлга қўйиш ва ногиронликни эрта аниқлаш, айниқса, онкология, юрак-қон томир ва қандли диабет касалликларига тўғри ташхис қўйиш имконини берувчи замонавий тиббий лабораторияларини ташкил этиш бўйича таклифларни билдирди.
Мазкур лойиҳаларнинг амалга оширилиши натижасида вилоятда янги иш ўринлари яратилиши, маҳаллий аҳолини сифатли дори-дармонлар билан таъминлаш имкониятлари ва умумий соғлиқни сақлаш тизими самарадорлиги ошишига хизмат қилиши таъкидланди.
Учрашув якунида томонлар ҳамкорликни йўлга қўйиш бўйича мулоқотларни давом эттириш тўғрисида келишувга эришди.
Изоҳ (0)