Япониялик гимнастикачи тамаки ва алкоголь маҳсулотларини истеъмол қилгани туфайли Олимпия терма жамоасидан четлаштирилди.
Kyodo хабарига кўра, спорт гимнастикаси бўйича Япония аёллар терма жамоаси сардори Сёко Мията терма жамоадан четлатилган ва Париж—2024 ўйинларида иштирок этмайди.
Аввалроқ 19 ёшли Мията Монакодаги йиғинда чеккан ва спиртли ичимликлар истеъмол қилганини тан олганди. Спортчи буни мусобақада қатнашиш учун катта босимни ҳис қилгани сабаб содир этганини айтган.
Япония қонунчилигига кўра, 20 ёшгача бўлганлар учун чекиш ва спиртли ичимликлар истеъмол қилиш тақиқланади.
Мамлакат гимнастика федерацияси (JGА) гимнастикачининг ўрнига бошқа спортчи қўйилмаслигини айтди. Одатда спортчини алмаштириш учун жароҳат ёки бирор касаллик аниқланиши керак.
2022 йилда Мията Жаҳон чемпионатида бронза медали соҳибига айланган.
Маълумот учун, Париж Олимпиадаси 26 июлдан 11 августгача бўлиб ўтади.
Изоҳ (0)