Самарқанд вилоятидаги 11 та туман (шаҳар) ҳокимликларининг қабул қилган норматив-ҳуқуқий ҳужжатлари “Рақобат тўғрисида”ги қонун талабларига зид экани аниқланди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.
Қайд этилишича, 2024 йил II чорак якунида Рақобат қўмитасининг Самарқанд вилояти ҳудудий бошқармаси томонидан Самарқанд вилоятидаги туман (шаҳар) ҳокимликларининг қабул қилган норматив-ҳуқуқий ҳужжатларини “Рақобат тўғрисида”ги қонун талабларига мослиги ҳамда рақобатни ривожлантиришга тўсқинлик қиладиган ҳужжатларнинг қабул қилиниши юзасидан ўрганиш ишлари ўтказилган.
Ўрганишлар давомида Самарқанд вилоятидаги туман ва шаҳар ҳокимликлари (Иштихон, Пайариқ, Паст Дарғом, Тойлоқ, Қўшработ, Самарқанд, Ургут, Жомбой, Каттақўрғон, Нарпай ва Каттақўрғон шаҳар) томонидан қабул қилинган норматив тусдаги ҳужжатлар “Рақобат тўғрисида”ги қонунининг 22-моддаси талабларига зид равишда қарор, буйруқ ва фармойишлар қабул қилишда, шартномалар тузишда устунлик беришда, айрим хўжалик юритувчи субъектларнинг фаолияти учун бошқа камситувчи ёки имтиёзли шартлар белгилашда камчиликларга йўл қўйилгани аниқланган.
Ўрганиш ишлари натижаларига кўра, ҳудудий бошқарма томонидан шаҳар ва туман ҳокимликларига қонун бузилиш ҳолатларини бартараф этиш ва келгусида бу каби ҳолатларга йўл қўймаслик тўғрисида тегишли тақдимномалар берилган.
Эслатиб ўтамиз, январь ойида Тошкент шаҳрида фаолият юритувчи туман ва шаҳар ҳокимлари, шунингдек, Тошкент шаҳар ҳокимининг 60 та қарори судда ҳақиқий эмас деб топилгани тўғрисида хабар берилганди.
Изоҳ (0)