АҚШ Демократик партиясининг асосий донорларидан бири президент Жо Байден учун расмий нутқ тайёрлади, унда у сайлов пойгасидан “шараф билан” чиқишини эълон қилиши мумкин, деб ёзади Daily Beast.
Нашр йирик ҳомий томонидан Жо Байденга президентлик пойгасидан муносиб чиқиб кетишига имкон бериш мақсадида ёзилган “ғалаба нутқи”нинг қоралама версиясини олган. Материалда ҳомийнинг номи ёки нутқнинг бевосита матни ошкор этилмаган, бироқ асосий фикрлар қайд этилган.
Нутқ муаллифига кўра, Байден Американинг “руҳини сақлаб қолиш” кун тартибидаги асосий вазифа эканлигини, мамлакат демократияси хавф остида эканлигини, шу сабабли демократ номзод сайловда ғалаба қозониши кераклигини таъкидлашдан бошлаши керак.
Бундан ташқари, Байден ҳали ҳам ўзининг президентлик қобилиятига ишонишини, аммо кўпчилик америкаликлар бу лавозимда ёшроқ сиёсатчини кўришни хоҳлаётгани учун бошқа номзодга ўрнини бўшатишга қарор қилганини айтиши керак.
Алоҳида таъкидланишича, Байден Ғазодаги можарога барҳам бериш учун курашишга ва Демократик партиядан муқобил номзодни қўллаб-қувватлашга ваъда бериши керак.
Аввалроқ Байден қайта сайланиш учун курашдан воз кечмаслигини таъкидлаган эди.
Изоҳ (0)