Фарғонада маҳкумга тайинланган жазони ўзгартириб бериш эвазига 50 минг доллар олган адвокатлар ушланди (видео)

Давлат хавфсизлик хизмати ходимлари томонидан адвокатларнинг ноқонуний ҳаракатларига чек қўйилди.

Хусусан, Фарғона шаҳридаги адвокатлик фирмаларида ишловчи икки нафар адвокат ўзаро тил бириктириб, 2023 йилда суд ҳукми билан 6 йил 8 ой муддатга озодликдан маҳрум қилинган ва ҳозирда жазо муддатини ўтаётган маҳкумга нисбатан бўлган жиноят ишини вилоят суди томонидан тафтиш тартибида кўриш давомида, унга нисбатан тайинланган жазони суд органларидаги танишлари орқали озодликдан маҳрум қилиш билан боғлиқ бўлмаган бошқа жазога ўзгартириб бериш эвазига 50 минг доллар олган вақтида ашёвий далиллар билан ушланган.

Тошкент шаҳридаги адвокатлик фирмасининг муқаддам бир неча маротаба судланган адвокати Ички ишлар вазирлигининг Тергов департаменти томонидан тергов ҳаракатлари олиб борилаётган, тўқимачилик маҳсулотлари ишлаб чиқаришга ихтисослашган МЧЖнинг мансабдор шахсларига нисбатан қўзғатилган жиноят иши доирасида аниқланган 12 миллиард сўм миқдоридаги зарарнинг 6 миллиард сўмини прокуратура ва ички ишлар органларидаги танишлари ёрдамида жабрланувчи фойдасига ундириб бериш эвазига 100 минг доллар талаб қилган. У сўралган пул маблағидан 50 минг долларни олган вақтида ашёвий далиллар билан ушланган.

Шунингдек, тезкор тадбир давом эттирилиб, адвокатнинг мазкур ноқонуний ишга алоқадор бўлган ҳамкасби ва муқаддам прокуратура органларида ишлаган таниши ҳам 50 минг доллардан 30 минг долларни олган вақтида қўлга олинган.

Самарқанд шаҳридаги адвокатлик фирмасининг муқаддам судланган адвокати Оқдарё туманида яшовчи фуқаронинг турмуш ўртоғи билан қонуний никоҳини бекор қилишда суд тизимидаги танишлари орқали ёрдам бериш эвазига 5 минг доллар олган вақтида ашёвий далиллар билан ушланган.

Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

Эслатиб ўтамиз, 2022 йилда Тошкентдаги МЧЖда ўтказилган камерал солиқ текшируви натижасида аниқланган ҳуқуқбузарликлар юзасидан молиявий жарима қўлламаслик эвазига 23 минг доллар талаб қилган адвокат қўлга олинган эди.