3 июль куни катта экранларда намойиш этилган “Яхши бўлиш осонми-4” анимацион фильми дунё бўйлаб 437 миллион доллар фойда кўрди ва АҚШ кинопрокатида ҳам етакчига айланди, деб хабар бермоқда “Правила жизни” нашри.
Мультфильмнинг навбатдаги қисми франшизанинг умумий даромади 5 миллиард доллардан ошишига сабаб бўлди ва тарихдаги энг юқори даромад келтирган анимацион фильмга айланди.
Фильм режиссёри — Крис Рено, сценарий устида Майк Уайт ишлаган. Сюжетда турмуш ўртоғи билан уч фарзандни тарбиялаётган собиқ ёвуз Грюнинг кейинги ҳаёти тасвирланади. Грю ва унинг рафиқаси Люси йўлида қамоқдан қочган Максим Ле Мал ва Валентина исмли душманлар пайдо бўлади. Улардан қочиш мақсадида оила минёнлар билан бирга яширин уйга кўчиб кетишга мажбур бўлади, сўнг улар биргаликда Ле Малга қарши курашишга қарор қилади.
“Яхши бўлиш осонми?” биринчи қисми 2010 йил июнь ойида чиқди ва 543 миллион доллардан ортиқ даромад келтирди. Американинг Illumination ва Universal Pictures компаниялари ушбу фильмларга қўшимча равишда иккита спин-оффни чиқарди: 2015 йилда “Минёнлар” (1,16 миллиард доллар) ва 2022 йилда “Минёнлар: Грюнинг юксалиши” (940 миллион доллар) намойиш этилди.
Illumination студияси франшизани ривожлантиришда давом этмоқда: компания июль ойида сариқ мавжудотлар ҳақидаги фильмнинг янги қисми устида иш бошлангани ҳақида хабар берди. “Минёнлар-3” анимацион фильмининг премьераси 2027 йилда бўлиб ўтиши режалаштирилган.
Изоҳ (0)