Россия статистика агентлиги (Росстат) биринчи марта россияликларнинг ташқи сабаблардан ўлим статистикасини яширди, дея Deutsche Welle хабар берди.
Демограф Алексей Ракшанинг таъкидлашича, 12 июлда эълон қилинган йиллик статистик маълумотлардан ташқи сабабларга кўра ҳалок бўлганлар сони ва ўлим ҳолатлари бўйича батафсил маълумотларни ўз ичига олган иккита жадвал олиб ташланган.
Статистик маълумотлар Россия аҳолисининг минтақалар бўйича ўтган йилдаги табиий ҳаракатини ҳисобга олади. Хабарга кўра, вафот этганларни ёш бўйича ҳисобга олувчи жадвалда ўлим сабабларининг асосий тоифалари олиб ташланган, маълумотлар таълим даражаси бўйича тақсимланган.
Росстат статистикасидаги ташқи сабаблар касалликлардан эмас, балки йўл-транспорт ҳодисалари, қотилликлар ва ўз жонига қасд қилиш натижасида келиб чиққан ўлимларни ўз ичига олади. Россия-Украина уруши бошланганидан сўнг, бу маълумотлар мустақил журналистлар учун урушда ҳалок бўлган руслар сонини тахмин қилиш усулларидан бирига айланган эди, дейилади хабарда.
Мустақил журналистларнинг ҳисоб-китоблари
“Муҳим ҳикоялар” мустақил тадқиқот интернет-нашри 2022 йилда ташқи сабабларга кўра аёллар ўлими камайганини, эркаклар ўлими эса ошганини таъкидлаган, унга кўра, тинчлик даврида эркаклар ва аёллар ўлими тенденциялари фарқ қилмаган. Мазкур статистика Россия-Украина уруши бошланганидан кейин ташқи сабаблардан ўлганлар сони рус армиясининг йўқотишларини тахмин қилиш имконини берган.
2023 йил июль ойида “Муҳим ҳикоялар” ташқи сабаблар туфайли ўлим бўйича статистик маълумотлардан фойдаланган ҳолда, Украинадаги урушда Россия армиясининг йўқотишларини камида 18 минг нафар кишига баҳолаган. Mediazona ва BBC нашрлари ҳисоблашича, 5 июль ҳолатига кўра, Россия йўқотишлари 58 207 нафар кишини ташкил этган.
Meduza ва Mediazona нашрлари Росстат маълумотларидан фойдаланган ҳолда тақдим этган ҳисоб-китобларга кўра, 2023 йилда эркаклар ўлими 2022 йилга қараганда деярли икки бараварга ошган. Ўлганлар сонини, шунингдек, Мерос ишлари реестри маълумотлари асосида ўтказилган тадқиқотлар орқали ҳам аниқлаш мумкин. Ушбу ҳисоб-китобларга кўра, 2022 йилдан бери урушда 120 мингга яқин рус ҳарбий хизматчилари ҳалок бўлган.
Изоҳ (0)