Мусиқа ва рақсни тақиқлаган “Толибон” мазкур тақиқларни ўзи бузди — The Telegraph (видео)

The Telegraph нашри “Толибон” аъзоларининг Ҳирот ғарбидаги боғда мусиқага рақс тушиши акс этган видеони тақдим этди.

Мазкур хабар 14 июль куни эълон қилинган, аммо бу воқеаларнинг ўзи қачон содир бўлганлиги кўрсатилмаган.

Толибон ҳаракатидаги бундай қарама-қаршиликлар фақат рақс билан чекланмаган. Нашрнинг гилмендлик анонимга таяниб хабар беришича, “Толибон”нинг қатор аъзолари мусиқага қўйилган тақиққа риоя қилмоқчи эмас. Манбага кўра, раҳбарият бу тақиқларни фақат ўз кучини кўрсатиш учун киритган.

Аввалроқ Афғонистонда Сарипул вилоятида “Толибон” аъзолари 100 та мусиқа асбобини ёқиб юборгани хабар берилганди. “Ахлоқ полицияси” мусиқали флеш-дискларни ҳам йўқ қилиши “Толибон”нинг “мусиқий геноцид”да айбланишга сабаб бўлмоқда.

Ушбу чораларга жавобан афғон мусиқачилари ўз асарларини нашид сифатида яширишга мажбур бўлмоқда, дейилади хабарда.

Афғонистонда ҳокимиятни қўлга киритганидан бери “Толибон” мусиқани тақиқлабгина қолмай, балки Афғонистоннинг йўқолиб бораётган маданий анъаналари сақловчиси бўлган мусиқачиларни ҳам омма олдида калтаклаган ва камситган.