2025 йилда Германия Украинага ҳарбий ёрдамни икки бараварга қисқартириб, тўрт миллиард евро ажратади. Бу ҳақда Reuters хабар берди.
Германия ҳукумати бир неча ой давом этган мунозаралардан сўнг 2025 йил учун режалаштирилган бюджетни тасдиқлаши кутилмоқда, дейди нашр.
Аввалроқ Германиянинг ҳукмрон партиялари мамлакатнинг 2025 йилги федерал бюджети бўйича келишувга эришгани хабар қилинган эди. Deutsche Welle’га кўра, ижтимоий харажатлар атрофида жуда кўп келишмовчиликлар кузатилган. Ҳукумат, шунингдек, солиқ тушумларининг етишмаслиги туфайли пайдо бўлган 10 миллиард евролик “туйнук”ни қандай ёпиш масаласини ҳал қилишга ҳаракат қилган.
2024 йил февраль ойи бошида ЕИ давлатлари Украинага блок бюджети доирасида 50 миллиард евро миқдорида молиявий ёрдам беришга келишиб олган эди. Еврокенгаш раҳбари Шарль Мишелнинг таъкидлашича, бу Украина учун доимий, узоқ муддатли ва башорат қилинадиган молиялаштириш имконини беради.
Германия канцлери Олаф Шольц Европа Иттифоқи давлатларини 2024 йилда Украинага кўпроқ ёрдам беришга чақирган эди. Унинг таъкидлашича, Украинага АҚШдан кейин энг йирик донор бўлган Германия “зарур бўлганча” ҳарбий ёрдам кўрсатишда давом этади.
Изоҳ (0)