Хитой ва Россия денгиз кучлари июль ойи бошидан бери Жанубий Хитой денгизида ҳарбий машғулотлар ўтказмоқда. Бу ҳақда Хитой Мудофаа вазирлиги баёнотига асосланиб, Anadolu нашри хабар берди.
Вазирликнинг ёзма баёнотида айтилишича, “Қўшма денгиз машқлари-2024” доирасидаги манёврлар Хитой жанубидаги Гуангдонг провинцияси яқинида амалга оширилмоқда. Ушбу провинциянинг денгизга туташ Чжанжианг ҳудудида улкан денгиз ва ҳаво кучлари контингенти тўпланган.
Машғулотлар йиллик ҳарбий машғулотлар режаси ва икки қуролли куч ўртасидаги ўзаро келишувга мувофиқ амалга оширилаётгани хабар қилинган. Россия ҳарбий маъмурияти ҳам ушбу хабарни тасдиқлаган.
Давом этаётган манёврлар денгиз хавфсизлиги муаммоларини биргаликда ҳал қилиш ҳамда глобал ва минтақавий тинчлик ва барқарорликни қўллаб-қувватлашда икки томоннинг қатъияти ва имкониятларини намойиш этишдан иборат эканлиги хабар қилинган. Жанубий Хитой денгизида қўшма машғулотлар бориши рақиб давлатлар учун денгиздаги ҳаракатларни қайта кўриб чиқиш учун сигнал бўлиши айтилган.
Япония икки давлатнинг денгиздаги машқлари юзасидан жиддий хавотирларини билдирган. Шарқий Осиё сувларидаги ҳар қандай ҳарбий ҳаракат қўшни давлатлар учун таҳдид экани билдирилган.
Хитой ва Россия ўртасидаги қўшма машғулотлар дастури улар ўртасидаги стратегик ҳамкорликнинг ёрқин намойиши эканлиги айтилган. Таҳлилчилар сўнгги манёврларни АҚШнинг ҳудуддаги ҳарбий иштироки кучайишига жавоб сифатида баҳолашган.
Изоҳ (0)