Тошкент вилояти Бўстонлиқ туманида икки нафар фуқаро 917,2 миллион сўмлик электр энергиясидан ноқонуний фойдалангани аниқланди. Бу ҳақда “Ўзэнергоинспекция” матбуот хизмати хабар берди.
Қайд этилишича, Бўстонлиқ туманида фуқаро Ш.Д.га қарашли “Беш тут” маҳалласида жойлашган турар жойнинг электр ҳисоблагичи “электроҳисоб” дастурида йўқлиги ҳамда ҳисоблагич муҳрланмасдан тармоққа тўғридан тўғри улаб, 745,7 миллион сўмлик электр энергиясидан ноқонуний фойдалангани аниқланган.
Шу каби ҳолат Бўстонлиқ туманида фуқаро К.Х.га қарашли “Шарқ Арча боғи” ҳудудида жойлашган турар жойнинг электр ҳисоблагичи “электроҳисоб” дастурида йўқлиги сабабли ўзбошимчалик билан ноқонуний равишда тармоққа уланиб, 171,5 миллион сўмлик электр энергиясидан ноқонуний фойдалангани маълум бўлган.
Мазкур ҳолатлар юзасидан тегишли ҳужжатлар расмийлаштирилиб, ҳуқуқни муҳофаза қилувчи органларга юборилган.
Аввалроқ Ўзбекистонда 2024 йилнинг биринчи ярмида 550 миллиард сўмдан ортиқ электр энергияси ва табиий газдан ноқонуний фойдаланиш ҳолати аниқлангани тўғрисида хабар берилганди.
Изоҳ (0)