Словакия бош вазири Москвадаги парадда қатнашмайдиган бўлди

Словакия бош вазири Роберт Фицо 9 май куни Москвадаги парадда иштирок этмайди. У фақат Россия президенти Владимир Путин билан қисқа учрашув ўтказишни режалаштирмоқда. Бу ҳақда сиёсатчининг нутқига таяниб SME хабар берди.

Фицонинг айтишича, у “1945 йилда Қизил Армия томонидан амалга оширилган озодлик учун миннатдорлик” белгиси сифатида ёдгорлик пойига гул қўйишни режалаштирмоқда.

“Қизил Армиянинг номаълум аскари қабрига Словакия халқи номидан озодлик учун миннатдорлик билдиришга гул қўяман ва президент Путин билан қисқа учрашув режалаштирилган. Шу холос. Мен ҳеч қандай ҳарбий парадда қатнашмайман”, деди Словакия ҳукумати раҳбари.

У, шунингдек, Европа Комиссияси томонидан қораланган Россияга бориш қарорига изоҳ берди.

“Мен ўзимни қандайдир виждон азоби уйғонадиган вазиятга тушиб қолишимга йўл қўймайман”, деди Фицо.

Маълумот ўрнида, Украина президенти Владимир Зеленский 4 май куни Ереванда Фицо билан учрашган эди. Словакия Украинанинг Европа Иттифоқига аъзо бўлишини қўллаб-қувватлашини маълум қилган. Шунингдек, Фицо “Брюссел ҳожатхоналарида ундан Путин учрашувда нима деганини сўрашлари” ҳақида гапирган.

Аввалроқ Эстония, Литва ва Латвия Словакия бош вазири учун ўз ҳаво ҳудудларини ёпишини маълум қилганди. Бунга жавобан Фицо Россияга ташриф буюриш учун муқобил йўл топишга ваъда берган. Шундан сўнг Чехия Словакия бош вазирининг Москвага ташрифи учун ўз ҳаво ҳудудидан фойдаланишга рухсат берган.

2025 йилда Москвадаги 9 май парадида 27 та давлат раҳбари, жумладан, Хитой, Беларусь, Куба, Венесуэла, Словакия ва Сербия етакчилари иштирок этган эди. Ўшанда Латвия, Эстония, Литва ҳукуматлари Роберт Фицо ва Сербия президенти Александр Вучичнинг самолётларини ўз ҳудудидан ўтказишни рад этган.

2026 йил 9 май куни Москвадаги анъанавий парад узоқ вақтдан бери биринчи марта ҳарбий техникаларсиз ўтказилади. Россия Мудофаа вазирлиги буни “тезкор вазият”, Кремль эса “террорчилик таҳдиди” дея изоҳлади. Тадбир арафасида мобил алоқа ҳам чекланади. Ушбу чекловлар нафақат шаҳар марказида, балки бутун Москва ҳалқа йўли ҳудуди бўйлаб жорий этилади.