“Баҳоуддин Нақшбанд” ёдгорлик мажмуасига ҳисобланган қўшимча тўлов юзасидан “Бухоро ҳудудий электр тармоқлари корхонаси” АЖга нисбатан иш қўзғатилди. Бу ҳақда Рақобат қўмитаси хабар берди.
Ушбу ёдгорлик мажмуаси маркази томонидан Рақобатни ривожлантириш ва истеъмолчилар ҳуқуқларини ҳимоя қилиш қўмитасининг Бухоро вилояти ҳудудий бошқармасига келиб тушган мурожаатда электр тармоқлари амалда белгиланган тарифга нисбатан қўшимча тўлов ҳисобланаётганидан норози бўлиб, ушбу масалада амалий ёрдам сўралган.
Вазирлар Маҳкамасининг 2003 йил 22 августдаги 364-сонли қарорида Ўзбекистон ҳудудидаги диний ташкилотлар 2003 йил 1 сентябрдан бошлаб уларга кўрсатиладиган коммунал хизматларга тўловларни аҳоли учун белгиланган тарифлар бўйича тўлаши кўрсатилган.
Ҳудудий бошқарма томонидан олиб борилган ўрганишлар жараёнида, “Бухоро ҳудудий электр тармоқлари корхонаси” АЖ томонидан “Баҳоуддин Нақшбанд” ёдгорлик мажмуаси марказига етказиб берилган электр энергия учун юритилган ҳисоб-китобларда юқоридаги қарор талабларига риоя қилмаган ҳолда амалда белгиланган тарифларни ошириб қўллаш натижасида мажмуага нисбатан 115 миллион сўмлик қўшимча тўлов ҳисоблангани аниқланган.
Шу муносабат билан, бошқарма махсус комиссияси томонидан қонунчиликда белгиланган тартибда “Ҳудудий электр тармоқлари корхонаси” АЖнинг “Бухоро ҳудудий электр тармоқлари” АЖга нисбатан белгиланган тартибда иш қўзғатилди.
Изоҳ (0)