Ўзбекистонда дам олиш кунлари ёмғир ёғиши кутилмоқда

Дам олиш кунлари Ўзбекистонга Волгабўйи ҳудудларидан нисбатан салқин ва нам ҳаво кириб келиши кутилмоқда, деб хабар берди “Ўзгидромет”.

13 июль, шанба куни кечаси ва эрталаб Тошкент вилояти ва Фарғона водийси вилоятларида баъзи жойларда бир оз ёмғир ёғиши мумкин. Шунингдек, Устюрт ҳудудлари бўйича қисқа муддатли ёмғир ёғиши мумкин.

14 июль, якшанба куни Қорақалпоғистон Республикаси, Хоразм, Тошкент, Сирдарё вилоятлари ва Фарғона водийси вилоятларида қисқа муддатли ёмғир ёғиши ва момақалдироқ бўлиши кутилмоқда. Шунингдек, айрим тоғолди ва тоғли ҳудудларда қисқа муддатли ёмғир ёғади ва момақалдироқ бўлади. Республиканинг қолган ҳудудларида дам олиш кунлари ёғингарчилик кутилмайди.

Ҳаво ҳарорати 13—14 июль кунлари 30-35 даражагача, жанубда 36-39 даражагача пасаяди.

Шамол 7-12 метр/секунд тезликда эсади, баъзи жойларда 13-18 метр/секундгача кучаяди, айрим жойларда баъзида 18-23 метр/секундгача кучайиши, чанг-тўзон билан кузатилиши мумкин.

Тошкентда 13 июлда кечаси ва эрталаб шаҳар бўйича баъзи жойларда бир оз қисқа муддатли ёмғир ёғиши, момақалдироқ бўлиши мумкин. Якшанба, 14 июль куни ҳам қисқа муддатли ёмғир ёғиши, момақалдироқ бўлиши эҳтимоли бор. Дам олиш кунлари ҳарорат 32-34 даража бўлади.