Тошкентда ўқувчи қиз синфдошлари томонидан руҳий зўравонликка учрагани аниқланди

Тошкент шаҳар Мирзо Улуғбек туманида ўқувчи қиз синфдошлари томонидан руҳий зўравонликка учрагани аниқланди. Бу ҳақда болалар омбудсмани хабар берди. 

Унга кўра, болалар омбудсманига жорий йилнинг 12 июнь куни Тошкент шаҳрида яшовчи фуқаро Г.Х. (аёл киши) дан мурожаат келиб тушган. Мурожаатида Г.Х. нинг 2008 йилда туғилган қизи А.Т. Мирзо Улуғбек туманидаги 49-сонли мактабда ўқишини, синфдошлари унга руҳий зўравонлик қилганини, зўравонликни бартараф этиш юзасидан мактаб маъмуриятига қилган мурожаати эътиборсиз қолдирилганини билдириб, мактаб директори ва синф раҳбарига чора кўрилишини сўраган.

Болалар омбудсмани Мактабгача ва мактаб таълими вазирлигига юборган сўрови асосида мазкур ҳолат ўрганилиб, Тошкент шаҳар Мактабгача ва мактаб таълими бошқармаси томонидан 49-сонли умумтаълим мактаби масъул ходимларига нисбатан хизмат текшируви ўтказилган.

Ҳозирда текширув натижасига мувофиқ синф раҳбари Э.У. (аёл киши) га нисбатан интизомий жазо чораси қўлланилди, мактаб директори Р.Н. эса мактабда юз берган бундай вазиятни бошқара олиш малакаси етарли эмаслиги сабабли малака ошириш учун махсус ўқув курсларига йўналтирилди.