Венгрия бош вазири Виктор Орбан Владимир Зеленскийга Украинадаги вазиятни тартибга солиш бўйича музокаралар олдидан ўт очишни тўхтатиш имкониятини кўриб чиқишни маслаҳат берди. Бу ҳақда Reuters сиёсатчининг баёнотларига таяниб, хабар берди.
Венгрия бош вазири Зеленскийдан Киевга кутилмаган ташрифи чоғида тинчлик музокараларини тезлаштирадиган тезкор ўт очишни тўхтатиш масаласини кўриб чиқишни сўради, — дейилади хабарда.
Орбаннинг таъкидлашича, Венгрия Европа Иттифоқига раислик қиладиган кейинги олти ой давомида Украинада тинчлик ўрнатиш асосий масала бўлади.
Венгрия бош вазири ўн йил ичида илк марта Киевга келди. Унинг сўзларига кўра, у ўз мақсадини тинчлик муаммоларини ҳал этиш ва икки томонлама муносабатларни ривожлантиришда кўради.
Кремль Орбаннинг Киевга ташрифидан ҳеч қандай натижа кутмаётганини қайд этган.
14 июнь куни Россия президенти Владимир Путин Украинадаги можарони ҳал қилиш бўйича Қрим, ДХР, ЛХР, Херсон ва Запорожье вилоятларининг Россия ҳудуди сифатидаги мақомини тан олиш, Украинанинг қўшилмаслик ва ядро қуролидан холи мақомини мустаҳкамлаш, уни демилитаризация ва денацификация қилиш, шунингдек, Россияга қарши санкцияларни бекор қилишни назарда тутувчи янги тинчлик таклифларини илгари сурган эди.
Изоҳ (0)