Ўзбекистоннинг тўрт ҳудудида электрдан ноқонуний фойдаланганлар аниқланди. Бу ҳақда Прокуратура департаменти хабар берди.
Унга кўра, “Ўзэнергоинспекция”, Бош прокуратура ҳузуридаги департамент ҳамда электр таъминоти корхоналари ходимлари билан ҳамкорликда ўтказилаётган назорат тадбирларида электр энергиясидан ноқонуний фойдаланиш ҳолатлари аниқланмоқда.
Хусусан, Хоразм вилояти Урганч туманида фаолият юритувчи “V.Б.” МЧЖга тегишли сув насосларини тармоққа электр ҳисоблагичдан ташқари яширинча улаб, жами 2,2 миллиард сўмлик электр энергиясидан ноқонуний фойдалангани аниқланган.
Бу каби ҳолат Бухоро вилоятида “У.Б.” фермер хўжалигига қарашли сув насосини умумий фойдаланишдаги электр тармоғига ҳисоблагичдан ташқари яширинча улаб, 223,5 миллион сўмлик электр энергиясидан ноқонуний фойдалангани аниқланган.
Шунингдек, Самарқанд вилояти Қўшработ туманида эса “Н.У.” ва “Қ.Д.” фермер хўжаликлари раҳбарлари ер майдонларини суғориш учун сув насосларини ўзбошимчалик билан тармоққа улаб, жами 215,3 миллион сўмлик электр энергиясидан ноқонуний фойдалангани маълум бўлди.
Шу каби, департаментнинг Фарғона туман бўлими томонидан ўтказилган терговга қадар текширувларда “В.Ж.” фермер хўжалигида ҳамда ЯТТ А.А.нинг автомобилларга техник хизмат кўрсатиш шохобчасида ўрнатилган электр ускуналари ҳисоблагичдан ташқари электр тармоқларига уланиб, жами 146,2 миллион сўмлик электр энергиясидан ноқонуний фойдаланилгани аниқланган.
Мазкур ҳолатлар юзасидан тегишли ҳужжатлар расмийлаштирилиб, ҳуқуқни муҳофаза қилувчи органларга юборилди.
Изоҳ (0)