Тошкент шаҳар Олмазор туманида 182 та жаримани тўламаган ҳайдовчининг машинаси хатланди. Бу ҳақда МИБ ахборот хизмати “Дарё”га хабар берди.
Унга кўра, Мажбурий ижро бюросининг Олмазор туман бўлими иш юритувига Тошкент шаҳар ИИББ ЙХХБ нинг қарорларига асосан, қарздор Ф.М.дан 2021 йилдан 2024 йилга қадар жами 182 та 59 370 000 сўм миқдоридаги ижро ҳужжати бўлим иш юритувига келиб тушган. 3 йил давомида йўл ҳаракати қоидаларини бузиб ҳаракатланган ҳайдовчининг маъмурий жарималари 182 та етиб, салкам 60 миллион сўм қарздорлик аниқланган.
Бўлим давлат ижрочиси томонидан мажбурий ижро ҳаракатларига киришилиб, қарздорга тегишли бўлган автотранспорт воситасига қидирув эълон қилинган. Ҳаракатлар давомида унга тегишли бўлган Cobalt топилиб, давлат ижрочиси томонидан хатланган.
Ҳозирда автотранспорт воситасини аукцион савдоларига чиқариш чоралари кўрилмоқда. Онлайн савдолардан тушган пул маблағлари қарздорликни қоплаш учун давлат фойдасига йўналтирилади.
Изоҳ (0)