Ўзбекистоннинг Малайзиядаги элчиси Каромиддин Гадоев FIVE Petroleum Malaysia компанияси асосчиси ва бош директори Кинг Лим Чин Фуи билан учрашув ўтказди. Бу ҳақда “Дунё” агентлиги хабар берди.
Қайд этилишича, мулоқот чоғида Малайзия компанияси раҳбари билан Ўзбекистонга инвестиция киритиш имкониятлари муҳокама қилинган. Кинг Лим май ойида Самарқандда бўлиб ўтган бизнес-форумда вилоят ҳокимлиги билан алюминий банкалар ишлаб чиқариш лойиҳаси бўйича эришилган келишувни амалга оширишдан манфаатдор эканини маълум қилган.
FIVE Petroleum Malaysia раҳбари компания томонидан ишлаб чиқарилиши режалаштирилаётган алюминий банкаларини етказиб беришда мамлакатда фаолият кўрсатаётган салқин ичимликлар ишлаб чиқариш корхоналари билан ҳамкорлик ўрнатишга тайёрлигини билдирган. Шунингдек, Малайзия томони билан Тошкент шаҳри ва кейинчалик республиканинг бошқа ҳудудларида ёқилғи қуйиш шохобчалари тармоғини яратиш ва уларни замонавий ускуналар билан жиҳозлаш бўйича лойиҳани ҳам амалга ошириш ишларини бошлашга келишиб олинган.
FIVE Petroleum Malaysia компаниясига 2020 йилда асос солинган. Компания Малайзия бўйлаб 110 дан ортиқ автомобилларга ёқилғи қуйиш шохобчаларини бошқаради. Шунингдек, 400 дан ортиқ ёқилғи қуйиш шохобчаларига эга БHPэтрол компаниясининг 60 фоиз улушига эгалик қилади.
Аввалроқ Хитой компанияси Фарғонада йирик автомобилсозлик мажмуасини барпо этиши, Ўзбекистонда биринчи чиқиндиларни ёқиш заводини қуриш режалаштирилаётгани тўғрисида хабар берилганди.
Изоҳ (0)