“Чехия ташаббуси” доирасида сотиб олинган снарядларнинг биринчи партияси Украинага етиб келди. Шу билан бирга, Прага Киев юкни аниқ қачон қабул қилганини ошкор этмади.
“Бизнинг ташаббусимиз билан ўқ-дориларнинг биринчи партияси бир мунча вақт олдин Украинага етиб келди”, деб ёзди Чехия бош вазири Петр Фиала Х (Twitter) ижтимоий тармоғида.
Украинада ўқ-дориларнинг жиддий тақчиллиги юзага келганда, Чехия ташаббусни ўз қўлига олди ва Украина Қуролли кучлари учун зарур бўлган снарядларни қаердан сотиб олишни топди. Бунинг учун Прага молиявий жиҳатдан ёрдам бера оладиган давлатлар коалициясини тузди. Ташаббусга жами 20 га яқин давлат қўшилди.
4 апрель куни Чехия бош вазири Петр Фиала Прага Украина учун юз минглаб артиллерия ўқ-дориларини сотиб олиш учун ўн миллионлаб евро ажратишини маълум қилди.
АҚШ давлат котиби Энтони Блинкеннинг айтишича, 2024 йил охиригача Украина Чехия ташаббуси туфайли бир миллионгача снаряд олиши мумкин.
24 июнь куни Чехия мудофаа вазири Яна Чернохова Украина мудофаа кучлари ўқ-дориларнинг биринчи партиясини июнь охиригача олишини маълум қилганди.
Изоҳ (0)