Amazon яширинча ChatGPT’га рақобатчи тайёрламоқда

Amazon тўғридан тўғри OpenAI ChatGPT билан рақобатлашадиган чатбот устида ишламоқда. Metis номини олган лойиҳа ички синовдан ўтказилмоқда. Чатбот Amazon’нинг Olympus моделига асосланган бўлиб, оммага очиқ бўлган Тitan моделининг янада кучли версиясидир.

Business Insider маълумотларига кўра, Metis базавий даражада тасвирлар ва матнларни яратиш, ўз маълумотлар манбаларига ҳаволаларни алмашиш, қўшимча сўровларни таклиф қилиш ва ҳоказоларни амалга ошириши мумкин. Metis интернетда тегишли маълумотларни қидириши ва АI агенти сифатида ишлай олади (масалан, унга таътилда дам олиш йўналишини тузиш ваколати берилиши мумкин).

Нашр манбаларига кўра, Amazon Metis’ни яратиш учун Alexa ресурсларидан фойдаланмоқда, бундан ташқари, чатботларни ишлаб чиқиш гуруҳи қисман Alexa жамоасидан тузилган. Чатботнинг ишга туширилиши сентябрь ойида режалаштирилган, бироқ вақт ўзгариши мумкин.

Amazon ўз рақобатчилари шуғулланаётган АI пойгасига етиб олишга ҳаракат қилмоқда. Amazon Тitan’нинг сунъий интеллект модели бошқа компаниялар маҳсулотларига қараганда кучсизроқ ҳисобланади. Корпоратив мижозларга мўлжалланган Amazon Q чатботи турли хил баҳоларга эга. 

Бироқ Amazon бош директори Энди Жасси аввалроқ компаниянинг деярли ҳар бир бўлинмаси сунъий интеллект бўйича қандайдир лойиҳа устида ишлаётганини айтган эди. У, шунингдек, Amazon’нинг сунъий интеллект бўйича ташаббусларининг йиллик даромади тез орада1 миллиард доллардан кўпроққа етиши ва келгуси бир неча йил ичида “ўнлаб миллиард долларлар” олиб келишини таъкидлади.

Манбалардан бирининг хабар беришича, Жасси Metis устида иш олиб боришда яқиндан иштирок этади ва жамоанинг тараққиётини кузатиб боради.