Ўзбекистон Суперлигасининг 12-турида Наманганнинг “Навбаҳор” клуби ўз майдонида Навоийнинг “Қизилқум” жамоасини қабул қилди.
Охирги пайтда дуранглардан боши чиқмай қолган “Навбаҳор”дан мухлислар шиддатли ўйин ва салмоқли натижа кутган эди, бироқ уларнинг ишончи бу гал ҳам оқланмади.
69-дақиқада Асадбек Собиржоновга нисбатан меҳмонлар қўполлик ишлатди ва ҳакам “Қизилқум” дарвозасига 11 метрли жарима зарбаси белгилади. Пенальтини “Навбаҳор”нинг грузиялик ҳужумчиси Тома Табатадзе амалга оширди, аммо унинг зарбасидан сўнг тўп дарвоза тўсинига тегиб, майдон ташқарисига чиқиб кетди ва ҳисоб ўзгаришсиз қолди—0:0.
Ўйиндан кейинги матбуот анжуманида “Навбаҳор” бош мураббийи Самвел Бабаян иштирок этди ва мухлислардан узр сўради.
“Жамоага нимадир бўляпти, балки омад етишмаётгандир. Ўйин сифати бор, ҳаракат қиляпмиз, лекин вазиятлардан фойдалана олмаяпмиз, кетма-кет тўртинчи дурангни қайд этдик. Наманганда 3 йиллик фаолиятим давомидаги оғир вазиятга дуч келиб турибман. Қимматбаҳо очколарни бой бераётганимиз ачинарли, бунинг учун мухлислардан узр сўраймиз. Чемпионат айни пайтда қизғин паллада ва вазиятни ўнглаш учун ҳали бизда имконият бор”, — деди Самвел Бабаян.
“Дарё” ушбу ўйиндан фотогалерея тайёрлади.
Изоҳ (0)