Ўзбекистонда банк сирини ошкор этганлик учун жиноий жавобгарлик белгиланиши кутилмоқда

Ўзбекистонда банк сирини ошкор этганлик учун жиноий жавобгарлик белгилаш режалаштирилмоқда.

Жиноят кодекси ҳамда Маъмурий жавобгарлик тўғрисидаги кодексга сир тутиладиган ахборотларни ҳимоялашга оид қонунчиликни бузганлик учун жавобгарликни такомиллаштиришга қаратилган ўзгартиришлар киритиш тўғрисидаги қонун лойиҳаси муҳокамага қўйилди.

Лойиҳа билан тижорат ва банк сирини ошкор қилиш учун маъмурий жавобгарликни бекор қилиб тижорат, банк, солиқ ёки суғурта сири ҳисобланган ахборотдан ноқонуний фойдаланиш, тўплаш ёхуд ошкор қилиш учун жиноий жавобгарликни белгилаш назарда тутилмоқда.

Жазо тариқасида БҲМнинг 100 бараваридан 250 бараваригача (34 миллион сўмдан 85 миллион сўмгача) жарима ёки бир йилгача озодликни чеклаш ёхуд озодликдан маҳрум қилиш белгиланмоқда.

Оғирлаштирувчи ҳолатларда икки йилдан уч йилгача озодликдан маҳрум қилиш жазоси таклиф этилмоқда. 

Яъни, ушбу ҳаракатлар:

• такроран ёки хавфли ресидивист томонидан;
• шахс томонидан ўз хизмат мавқеидан фойдаланган ҳолда;
• кўп миқдорда зарар етказган ҳолда;
• бир гуруҳ шахслар томонидан олдиндан тил бириктириб содир этилган бўлса, —

БҲМнинг 250 бараваридан 500 бараваригача (85 миллион сўмдан 170 миллион сўмгача) жарима ёхуд бир йилдан икки йилгача озодликни чеклаш ёки бир йилдан икки йилгача озодликдан маҳрум қилиш билан жазолаш режалаштирилмоқда.

Ушбу ҳаракатлар:

• жуда кўп миқдорда зарар етказган ҳолда;
• мансабдор шахс томонидан;
• уюшган гуруҳ ёки унинг манфаатларини кўзлаб содир этилган бўлса, —

икки йилдан уч йилгача озодликдан маҳрум қилиш билан жазолаш режалаштирилмоқда.

Қайд этилишича, ушбу қонун жисмоний ва юридик шахслар иқтисодий ҳуқуқларининг кафолатланишини мустаҳкамлашга, банк сирини ташкил этувчи маълумотлар муҳофаза қилинишига, банк сирини ташкил этувчи маълумотларни ошкор этиш билан боғлиқ ноқонуний хатти-ҳаракатларнинг олдини олишга ҳамда сир тутиладиган бошқа турдаги ахборотларни ҳимоялашга оид қонунчиликни бузганлик учун жавобгарликни такомиллаштиришга хизмат қилади.

Лойиҳа ўзгартирилиши, унга қўшимчалар киритилиши ёки рад этилиши мумкин.