Ўзбекистон Хитойдан келаётган сайёҳлар сонини 1 миллион нафарга етказмоқчилиги хабар қилинди.
Унга кўра, 18 июнь куни Самарқанд шаҳрида ХХР туризм сектори вакиллари иштирокида бизнес-форум бўлиб ўтди. Форум Ўзбекистоннинг сайёҳлик салоҳиятини Хитойда тарғиб қилиш ва икки мамлакат туризм саноати вакиллари ўртасидаги ишбилармонлик алоқаларини мустаҳкамлашга бағишланди.
Бизнес-форумда 200 га яқин Ўзбекистон ва Хитойнинг туризм сектори вакиллари, жумладан, 16 июнь куни Сиан шаҳридан Самарқандга LoongAir авиакомпаниясининг биринчи мунтазам парвози орқали учиб келган соҳа вакиллари иштирок этди.
“Жорий йилнинг сентябрь ойидан “Хитойда Ўзбекистон туризм йили”га старт берамиз. Бир йил давомида хитойлик сайёҳларни Ўзбекистон туризми, бой маданияти, мероси, қадриятлари билан яқиндан таништирамиз. Умуман олганда Хитойдан келаётган сайёҳларни босқичма-босқич 1 миллионга чиқаришни пировард мақсад қилиб олганмиз,” — деди туризм қўмитаси раиси Умид Шодиев.
Форум давомида Ўзбекистон ва Хитой вакиллари ўртасида B2B форматидаги учрашувлар бўлиб ўтди. Унда иштирокчилар туризм соҳасининг бугунги ҳолати ва истиқболларини муҳокама қилдилар, Ўзбекистон ва Хитой ўртасидаги ҳамкорликнинг янги имкониятларини ўрганди.
Изоҳ (0)