18 июнь, сешанба куни Евро—2024 гуруҳ босқичи 1-тур учрашувида Португалия терма жамоаси Чехияни қийинчилик билан (2:1) мағлуб этди. Иккинчи бўлимга қўшиб берилган дақиқаларда ғалаба голини захирадан майдонга тушган Франциско Консейсао киритди.
Португалия терма жамоаси сардори Криштиану Роналду тўлиқ 90 дақиқа давомида майдонда бўлди ва ўйин олдидан ижтимоий тармоқлар орқали мухлисларга мурожаат қилди.
“Бугун тарихимизнинг яна бир боби бошланади. Терма жамоа сафидаги илк куним – қийинчиликлар ва ғалабаларга тўла йўлнинг бошланишини хурсандчилик билан эслайман. Ҳозирда иқтидор ва амбицияларга тўла чемпион жамоа билан бирга бўлиш шарафига муяссарман. Сизнинг қўллаб-қувватлашингиз туфайли биз орзуларни ҳақиқатга айлантирамиз. Келинг, яна бир ғалаба учун биргаликда курашайлик. Биз бирга бўлганимизда, бизни тўхтатиб бўлмайди. Португалияга, олға!”.
Терма жамоалар тарихидаги энг яхши тўпурар бу сафар гол ура олмади, бироқ унинг майдонда бўлиши янги рекордлар ўрнатишига етарли бўлди. Германиядаги турнир португалияликнинг фаолиятидаги олтинчи Европа чемпионатига айланди. Роналдудан кейинги ўринда унинг жамоадоши Пепе ва Хорватия терма жамоаси ярим ҳимоячиси Лука Модрич ҳозирда ўзларининг бешинчи қитъа чемпионатида қатнашмоқда.
Бундан ташқари, Криштиану Еврода ўтказилган ўйинлар сони бўйича ўзининг рекордини янгилади: ҳозир унинг ҳисобида 26 та ўйин мавжуд. Роналдунинг Европа чемпионати билан боғлиқ бошқа кўплаб рекордлари ҳам мавжуд:
- энг кўп ўйин дақиқалар сони (2243);
- энг кўп ғалабалар сони (13);
- жамоа сардори сифатида энг кўп ўйинлар сони (17);
- финал босқичида энг кўп голлар сони (14);
- саралаш босқичида энг кўп голлар сони (41).
Криштиану Роналду ушбу чемпионатда энг кекса гол муаллифига айланиши мумкин. Португалия терма жамоаси сардори ҳозир 39 ёшда ва амалдаги рекорд Австрия терма жамоасининг собиқ ярим ҳимоячиси Ивица Вастичга тегишли бўлиб, у 2008 йилда гол урган вақтида 38 ёш-у 257 кунлик эди.
Португалия терма жамоаси иккинчи турда Туркияга қарши 22 июнь куни баҳс олиб боради.
Изоҳ (0)