Фарғона вилояти Марғилон шаҳрида 24 минг 440 қути тамаки маҳсулотини ноқонуний муомлага киритилишининг олди олинди, деб хабар беради Бош прокуратура ҳузуридаги департамент.
Қайд этилишича, департаментнинг Марғилон шаҳар бўлими ва ИИБ ходимлари ҳамкорлигида тезкор тадбир ўтказилган. Тадбирда тамаки маҳсулотлари савдоси билан шуғулланиб келган М.Х. Райҳон кўчасидаги қурилиши тугалланмаган бинода умумий баҳоси 220 миллион сўмлик хорижда ишлаб чиқарилган тўрт турдаги жами 24 минг 440 қути тамаки маҳсулотларини ўтказиш мақсадида сақлаб келгани аниқланиб, ушбу маҳсулотлар ашёвий далил сифатида олинган.
Мазкур ҳолат юзасидан Жиноят кодексининг 25, 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Ургут, Қўшкўпир, Янгиҳаёт ҳамда Наманган туманларида қалбаки акциз маркали алкоголь ва тамаки маҳсулотларини муомалага киритилишининг олди олингани, Ўзбекистонда алкоголь ва тамаки бозорини тартибга солиш инспекцияси ташкил этилиши тўғрисида хабар берилганди.
Изоҳ (0)