18 июнь куни камида 882 нафар ноқонуний мигрант Ла-Манш орқали Буюк Британияга ўтган. Sky News Буюк Британия Ички ишлар вазирлигига таяниб хабар беришича, бу йил бошидан буён бир суткада мамлакатга келган мигрантларнинг энг йирик оқимидир.
Бу жорий йилдаги аввалги антирекорддан 171 кишига кўп ва 2022 йил 29 ноябрда Британия қирғоқларига ноқонуний етиб келган 947 нафар ноқонуний мигрантлар оқимидан кейин иккинчи ўринда туради.
Бу сафар Британия ИИВ маълумотларига кўра, муҳожирлар 15 та пуфлама қайиқдан фойдаланган, яъни уларнинг ҳар бирида ўртача 59 киши бўлган.
Йил бошидан бери Ла-Маншни ноқонуний кесиб ўтганлар сони 12 313 нафарга етди, бу ўтган йилнинг шу даврига нисбатан 18 фоизга кўп.
Ла-Манш орқали пуфланувчи қайиқларда Англия қирғоқларига етиб борган мигрантлар сони сўнгги йилларда муттасил ортиб бормоқда. Консерватив партиянинг ноқонуний миграцияга қарши кураш бўйича ваъдаларига қарамай, 2018 йилдан буён жами 110 мингдан ортиқ ноқонуний мигрант Ла-Манш бўйлаб Буюк Британияга ўтган.
Мурожаатларни кўриб чиқиш даврида ноқонуний мигрантлар одатда махсус марказларга жойлаштирилади, бироқ бу марказларнинг сони етарли эмас. Бундай мигрантларни сақлаш, Тhе Times газетасига кўра, Британия солиқ тўловчиларига йилига тахминан 4 миллиард фунт стерлинг (5,1 миллиард доллар) тушади. Хусусан, меҳмонхоналарда ноқонуний мигрантларни жойлаштириш учун кунига тахминан 6 миллион фунт (7,7 миллион доллар) сарфланади.
Изоҳ (0)