Қишлоқ хўжалигини ривожлантириш халқаро жамғармаси (IFAD) Ўзбекистонда ўз ваколатхонасини очди. Бу ҳақда вазирлик матбуот хизмати хабар берди.
Очилиш маросимида IFAD президенти Альваро Ларио ва Ўзбекистон қишлоқ хўжалиги вазири Иброҳим Абдураҳмоновлар иштирок этишди.
IFAD — халқаро молия институти ва БМТнинг махсус муассасаси, у 1978 йилда ташкил этилган. Жамғарма Римда жойлашган бўлиб, қишлоқ аҳолисига сармоя киритади ва камбағалликни қисқартириш, озиқ-овқат хавфсизлигини мустаҳкамлаш, овқатланишни яхшилаш ва чидамлиликни кучайтириш имкониятларини тақдим этади.
Тошкентдаги янги ваколатхона бизнинг Ўзбекистон ва минтақадаги барқарор ривожланиш жараёнларини қўллаб-қувватлашга бўлган содиқлигимизни акс эттиради. Ҳукумат ва хусусий сектор билан бўлган шериклигимиз орқали биз иқлим ўзгаришига мослашиш ва қишлоқ ҳудудларининг гуллаб-яшнашига киритиладиган кенг кўламли сармояларни рағбатлантиришимиз мумкин, — IFAD президенти деди Альваро Ларио.
Қайд этилишича, Ўзбекистон 2011 йилда мазкур жамғармага аъзо давлат сифатида қўшилганидан буён ҳамкорлик қилиб келмоқда. Мамлакатда ваколатхонанинг мавжудлиги қишлоқ хўжалиги тармоғининг эҳтиёж ва муаммоларини самаралироқ қамраб олиш ва ҳал этиш имконинини беради.
Сўнгги ўн йил ичида IFADънинг минтақадаги лойиҳалари портфели сезиларли даражада ошган, умумий инвестициялар ҳажми 435,3 миллион долларни ташкил этган ва 550 мингдан ортиқ қишлоқ аҳолисини қамраб олган.
IFAD дастурининг Ўзбекистоннинг стратегик имкониятлари бўйича жорий мамлакат дастури 2023−2027 йилларга мўлжалланган. У дастур доирасида Ўзбекистон ҳукумати билан миллий ва халқаро қўшма молиялаштиришни ўз ичига олган қиймати 250 миллион долларга тенг бўлган ишчи дастурни амалга ошириш ниятида.
Изоҳ (0)