АҚШ президентининг миллий хавфсизлик бўйича маслаҳатчиси Жейк Салливан яқинда Россия президенти Владимир Путин томонидан Украина бўйича таклиф қилинган ташаббусга изоҳ берди. Унинг сўзларига кўра, Россия президентининг таклифи БМТ Низоми, ахлоқ ва соғлом фикрга зиддир.
“Ҳеч бир масъулиятли давлат буни тинчлик учун асос деб айта олмайди. Бу БМТ Низоми, ахлоқ ва соғлом фикрга зиддир”, — деди у Швейцарияда бўлиб ўтган Украина бўйича тинчлик саммити чоғида.
Салливанга кўра, Владимир Путиннинг таклифи Украинанинг ўз суверен ҳудудларидан воз кечишни назарда тутади.
14 июнь куни Владимир Путин Украинадаги можарони тугатиш бўйича бир қанча шартларни илгари сурди:
- Украина қўшинларини Луганск ва Донецкдан, шунингдек, Херсон ва Запорожье вилоятларидан олиб чиқиб кетиш;
- Украинанинг НАТОга аъзо бўлишдан бош тортиши;
- Украина учун ядросиз ва нейтрал мақом;
- Россияга қарши санкцияларни бекор қилиш;
- Қрим ва Севастопол, Донецк ва Луганск, Запорожье ва Херсон вилоятларининг Россия Федерациясининг ҳудудлари сифатидаги мақомини халқаро ҳужжатларда белгилаш.
Украина президенти Владимир Зеленский Путиннинг таклифларини ультиматум деб атади ва Украина уларга ишонолмаслигини айтди.
Изоҳ (0)