Boeing ва Airbus компанияларининг баъзи самолётлари сохта мувофиқлик сертификатига эга бўлган титан компонентлари билан жиҳозланган. Бу ҳақда New York Times хабар берди.
Таъкидланишича, Қўшма Штатларда бунинг парвозлар хавфсизлиги учун оқибатлари ва бундай қисмларга эга самолётлар сонини аниқлаш учун тергов бошланган. Ҳужжатларни қалбакилаштириш иши бўйича терговни АҚШ Федерал авиация маъмурияти (FAA) ва Boeing учун фюзеляжлар, шунингдек, Airbus қанотларини етказиб берувчи Spirit АerоSystems компанияси олиб бормоқда.
Нашрнинг қайд этишича, таъминотчи компания металлда коррозия оқибатида келиб чиққан майда тешикларни аниқлаганидан кейин суриштирув бошланган. Вазиятдан хабардор манбаларга кўра, титан сотувчи Хитой компаниясининг ходими сертификатларни сохталаштирган ва материал ишончли таъминотчидан олинганини билдирган.
FAA баёнотида айтилишича, муаммо кўлами ўрганилмоқда ва бундай қисмлардан фойдаланиш самолётларнинг қисқа ва узоқ муддатли хавфсизлигига таъсири қандай бўлиши аниқланмоқда. Қанча самолётда шубҳали материаллардан тайёрланган қисмлар борлиги аниқ эмас.
Аввалроқ Boeing иссиқлик алмаштиргич муаммосидан ташқари, йўловчилар кабинаси учун ўриндиқларни ишлаб чиқаришда ҳам қийинчиликлар мавжудлигини билдирган. Етказиб берувчилар, айниқса, бизнес-классдаги ўриндиқларга бўлган талабни моддий тақчиллиги ва сертификатлаш кечикиши туфайли қондира олмаган.
Изоҳ (0)