“Ўзбекистон темир йўллари” ва Hyundai Rotem ўртасида электропоездлар сотиб олиш шартномаси имзоланди

Жанубий Корея президентининг Ўзбекистонга ташрифи доирасида 13 июнь куни “Ўзбекистон темир йўллари” ва Hyundai Rotem компаниясининг икки томонлама учрашуви бўлиб ўтди. Бу ҳақда “Ўзбекистон темир йўллари” матбуот хизмати хабар берди.

Hyundai Rotem компаниясининг Ўзбекистонга ташрифи давомида президент фармонига мувофиқ, Корея Иқтисодий ҳамкорликни ривожлантириш жамғармаси иштирокида “6 та тезюрар йўловчи электр поезди сотиб олиш” лойиҳасини амалга ошириш режасининг натижасида “Ўзбекистон темир йўллари”, “Темирйўлэкспресс” ва Hyundai Rotem компанияси ўртасида электр поездларини етказиб бериш ва уларга техник хизмат кўрсатиш бўйича шартнома имзоланди.

Учрашув давомида Жанубий Кореянинг Hyundai Rotem компаниянинг электропоездлари “Жалолиддин Мангуберди” деб номланди ва Тошкент—Урганч—Хива йўналишида қатнаши бўйича келишиб олинди.

Учрашув якунида “Ўзбекистон темир йўллари”, “Темирйўлэкспресс” ва Hyundai Rotem компаниялари ўртасида уч томонлама меморандум имзоланди.