АҚШ ҳукумати 12 июнь куни Россияга қарши санкциялар пакетини кенгайтирди. Бу ҳақда Вашингтондаги ҳукумат манбаларига таяниб, VOA News хабар берди.
Манбада айтилишича, Оқ Уй Россиянинг 300 дан ортиқ янги ташкилотлари ва давлат мансабдорларига санкция ва чекловлар киритган. Ушбу ташкилот ва субъектлар Россияга уруш ҳаракатларини давом эттиришга ёрдам берадиган маҳсулот ва хизматлар кўрсатишда, шунингдек, санкциялар оқибатларидан қочишга ёрдам беришда айбланган.
Санкциялар пакети АҚШ Молия вазирлиги томонидан эълон қилинган. Чекловга тушган компаниялар Россия билан бир қаторда Хитой, Туркия, шунингдек, Бирлашган Араб Амирликларида ҳам жойлашган.
“Россиянинг уруш иқтисодиёти халқаро молия тизимидан чуқур изоляция қилинган. Кремль армияси ташқи дунёга чиқишдан узиб қўйилган. Бугунги санкциялар Россия учун халқаро хом ашё ва техникага эришиш учун учинчи дунё мамлакатларига таяниш имкониятларини йўққа чиқаради”, — деган АҚШ Ғазначилик котиби Жанет Еллен.
Маълумотларга кўра, Украина уруши бошланганидан бери Қўшма Штатлар Россиянинг 4000 дан ортиқ тижорат компаниялари ва жисмоний шахсларига қарши санкциялар киритди. Ушбу ҳаракатлар Россияда ишлаб чиқаришни бутунлай тўхтатиш ва иқтисодиётда салбий ўзгаришга эришиш эди.
Изоҳ (0)