Албанияда келаси ҳафта парламент йиғилиши Евро—2024 сабабли бекор қилинди.
АS хабарига кўра, Албания парламентининг 140 нафар депутатининг аксарияти жамоанинг Евро—2024 гуруҳ босқичидаги ўйинларига ташриф буюришни режалаштирган, уларнинг кўпчилиги эса Германияга автомобилда боришни ва бир кундан кўпроқ вақтни йўлда ўтказишни режалаштиришган. Шу сабабдан пайшанба кунига белгиланган ҳафтанинг ялпи мажлиси чоршанба куни бўлиб ўтди ва кейинги ҳафтадаги йиғилиш бекор қилинди.
Қайд этилишича, мухолифатнинг айрим вакиллари парламент ҳаракатларига салбий муносабатда бўлиб, мажлиснинг бекор қилинишини регламентнинг бузилиши деб ҳисоблаган. Чоршанба куни бўлиб ўтган йиғилишда Албания Демократик партияси раҳбари Газмент Барди Албания бош вазири Эди Рамага норозилик билдирди.
“Сиз парламентга шахсий дўконингиздек муносабатда бўлдингиз. Раҳбар сифатида сиз фуқароларга сессия нима учун пайшанбадан чоршанбага кўчирилганини тушунтиришингиз керак бўлади. Сиз буни бажаришга мажбурсиз, чунки сиз мухолифат билан маслаҳатлашмасдан бир томонлама қарор қабул қилгансиз. Агар бунга Европа чемпионатига бориш сабаб бўлса, бу — шармандали иш ”, — деди Барди.
Албания терма жамоаси Евро—2024 даги юришини шанба куни Италияга қарши ўйин билан бошлайди. Альбанлар гуруҳ босқичида Хорватия ва Испания билан ҳам тўқнаш келади.
Изоҳ (0)