Европа Иттифоқи Марказий Осиёдаги барқарор транспорт алоқаларига 10 миллиард евро сармоя киритишга тайёрлигини маълум қилди. Бу ҳақда Европа Иттифоқининг Тожикистондаги делегацияси хабар берди.
Тожикистонга 30 ва 31 май кунлари Еврокомиссиясининг Халқаро ҳамкорлик бўйича Бош директорати катта маслаҳатчиси Ҳенрик Хололей бошчилигидаги юқори даражадаги миссия ташриф буюрди.
“Европа Иттифоқи халқаро ҳамкорларнинг биргаликдаги ҳиссаси сифатида Марказий Осиёда барқарор транспорт алоқасига 10 миллиард евро сармоя киритиш мажбуриятини эълон қилди”, — дейилади хабарда.
Еврокомиссия Европа Иттифоқининг Global Gateway стратегияси доирасида Транскаспий транспорт коридорини қўллаб-қувватлаш учун минтақавий транспорт дастурини тайёрламоқда.
Global Gateway Европа Иттифоқининг рақамли, энергетика ва транспорт соҳаларида ақлли, яшил ва хавфсиз алоқани ривожлантириш, шунингдек, бутун дунё бўйлаб соғлиқни сақлаш, таълим ва тадқиқот тизимларини мустаҳкамлаш бўйича янги стратегиясининг бир қисмидир. Ташаббус 2021 йилда Европа комиссияси ва Европа Иттифоқининг Олий вакили томонидан тақдим этилган.
Эслатиб ўтамиз, 2024 йил январь ойида Брюсселда бўлиб ўтган инвесторлар форумида Марказий Осиёнинг бешта давлати вакиллари Европа ва минтақа ўртасидаги транспорт йўналишларини мустаҳкамлаш, шу орқали минтақавий интеграцияни яхшилаш тарафдори эканини билдирганди.
Изоҳ (0)