Европарламентнинг Брюссель ва Страсбургдаги офисларида Россиянинг таъсири бўйича тергов доирасида тинтувлар бошланди. Бу ҳақда Der Spiegel нашри хабар берди.
Хабарга кўра, рейдлар “Европа овози” ахборот портали фаолияти билан боғлиқ бўлиб, у Россиянинг таъсир ўтказиш амалиёти марказида тургани айтилган. Тинтувлар нидерландиялик парламентарий ходими Марсель де Грааф Гийом П. кабинетида олиб борилмоқда.
Бельгия прокуратураси рейдни “аралашув, пассив коррупция ва жиноий ташкилотга аъзолик ишининг бир қисми” деб атаган. Ҳуқуқ-тартибот идорасига кўра, тинтувлар Россия аралашуви аломатлари билан боғлиқ, бунинг натижасида Европарламент аъзоларига “Европа овози” ахборот сайти орқали Россия пропагандасини тарғиб қилиш учун пул тўланган.
Текширув ҳақида аввалроқ Бельгия бош вазири Александр де Кро эълон қилган эди. Унга кўра, разведка Европа Иттифоқида Украинани қўллаб-қувватлашга путур етказмоқчи бўлган тармоқ мавжудлигини тасдиқлаган. У, шунингдек, Европарламент аъзоларига Россия ташвиқотини тарғиб қилиш учун пул таклиф қилишганини айтган.
Москванинг мақсадлари жуда аниқ. Мақсад – Европарламентга кўпроқ россияпараст номзодларни сайлашга ёрдам бериш, — деди де Кро.
Аввалроқ Чехия “Европа овози” порталига қарши санкциялар киритган эди. Чехия расмийлари Прагада жойлашган портал Москванинг таъсир қилиш воситаси эканлигига ишонч билдирган. Чехия разведка хизматига кўра, нашр орқали Европа сайловларида Россияга дўст бўлган номзодларга молиявий ёрдам кўрсатилган.
Изоҳ (0)