Швеция ҳукумати 29 май куни Украинага 1,3 миллиард доллар миқдорида ҳарбий ёрдам маблағи ажратишини эълон қилган. Бу ҳақда Швеция Мудофаа вазирлиги тарқатган хабарга асосланиб, Тhе Kyiv Independent нашри маълум қилди.
Швеция Мудофаа вазирлиги чоршанба куни Украинага 13,3 миллиард швед кронаси қийматидаги янги ҳарбий ёрдам пакетини ажратишини расман эълон қилган. Бу сўнгги ёрдам дастури Швециянинг Украина уруши бошланганидан бери энг катта ҳарбий ёрдам пакетидир.
Мудофаа вазирлигининг қўшимча қилишича, ёрдам пакети АSC 890 радар разведка ва назорат самолётлари, “Пансарбандвагн-302” пиёдалар жанговар машиналари, артиллерия снарядлари, ҳавога қарши ракеталар ва илгари совға қилинган ҳарбий техникани сақлаш ва тўлдиришга ёрдам берадиган материалларни ўз ичига олади.
Пакет шунингдек, молиявий ёрдам, сунъий йўлдош алоқаси ресурслари ва Швециянинг Total Defense Research Institute муассасаси томонидан Украинага ўз тадқиқот имкониятларини ривожлантиришга ёрдам бериш учун мандатни ҳам ўз ичига олади.
Украина президенти Владимир Зеленский Швецияга ҳарбий ёрдам пакети учун миннатдорчилик билдириб, “бу таъминотлар Украина мудофааси ва мустаҳкамлиги учун жуда муҳим” эканлигини айтган.
28 май куни ҳам Швеция ҳукумати Украинага 615 миллион швед кронаси (58,2 миллион доллар) қийматидаги янги энергия ёрдам пакети тақдим этишини эълон қилган эди. Орадан бир кун ўтиб, янги ҳарбий ёрдам пакети тасдиқлан.
Маълумотларга кўра, Швеция ҳозирга қадар Украинага 9 миллиард долларга яқин қийматдаги ҳарбий ва молиявий пакетлар тақдим этган. Ҳукумат 2024-2026 йилларда ҳам жами 7 миллиард доллар маблағ Киев учун ажратилишини расман тасдиқлаган.
Изоҳ (0)