Хави “Барселона”да энг кўп ўйин ўтказган мураббийлар топ-10 лигидан жой олди

“Барселона”ни тарк этган Хави жамоа мураббийлигида энг кўп ўйин ўтказган мутахассислар топ-10 лигидан жой олди.

Испания чемпионатининг 38-туридан ўрин олган “Севилья”га қарши баҳс (2:1) Хави учун барча мусобақалардаги 143-ўйин бўлди. Бу борада мураббий Эленио Эррерага етиб олди.

Ундан олдинда Эрнесто Вальверде (145), Фердиданд Даучик (151), Терри Венейблс (169), Луис Энрике (181), Луи ван Гал (200), Пеп Гвардиола (247), Ринус Михелс (267), Франк Райкард (273) ва Йоҳан Кройф (421) каби мураббийлар бор. 

Хави 143 та ўйиндан 90 тасида ғалаба қозонган. 24 тасида дуранг натижа қайд этилган, қолган 29 та учрашувда мағлубиятга учраган.

Эслатиб ўтамиз, 28 январда Хави мавсум охирида “Барселона” мураббийлик постини тарк этишини таъкидлаганди. Кейинчалик бир неча бор бу қарорини ўзгартирмаслигини ҳам айтиб ўтганди. Бироқ раҳбарият апрель ойида испаниялик мутахассисни жамоада қолдиришга кўндирганди. Яна вазият ўзгариб, клуб мураббий билан ҳамкорликни тўхтатди.

Хави “Барселона”ни 2021 йилнинг ноябридан бери бошқариб келаётган эди. Унинг қўл остида жамоа Испания чемпионати ва мамлакат Суперкубогини қўлга киритди.