Тошкент вилоятида амалга оширилаётган Жанубий Корея тажрибаси асосида кўчат экилиши 10 кун муддатда таъминланади. Вилоят ҳокими Зоир Мирзаевнинг бу борадаги тегишли қарори қабул қилинди.
Қайд этилишича, Жанубий Корея тажрибаси асосида Нурафшон ва Бекобод шаҳарлари, Ўрта Чирчиқ, Тошкент ва Оҳангарон туманлари ҳудудидан жами 34 гектар ер майдони 30 йил муддатга ободонлаштириш бошқармаларига бириктирилади.
Ҳар 1 гектар ер майдони учун маҳаллий бюджетдан 100 миллион сўм маблағ ажратилади ва томчилатиб суғориш тизими жорий қилинади.
Бунда, ерни тайёр ҳолга келтириб, дарахт экишга хоҳиши бўлган аҳолига ўзи истаган турдаги кўчатни экиши учун шароит яратиб, ҳар бир дарахт кўчат эккан шахс номига тамғаланади. Дарахтларни парваришлаш учун ободонлаштириш бошқармаси штатлари доирасидаги ҳар 1 гектар учун бир нафар ходим бириктирилади.
Шунингдек, шаҳар ва туман ободонлаштириш бошқармалари штат бирликлари доирасида “Яшил келажак боғи” бўлимлари фаолияти ташкил этилади.
Апрель ўрталарида экология вазири маслаҳатчиси, жамоатчилик фаоли Расул Кушербаев пойтахтда туман экология бўлими масъуллари ИИБ ходимлари ҳамда прокуратура органи томонидан қўшиб ёзишга мажбурланаётгани, буни бажармаган масъуллар 10 соатлаб ИИБ биносида ноқонуний ушлаб турилганини хабар қилганди. Тошкент шаҳар прокуратураси ахборот хизмати раҳбари Хуршида Раҳмонованинг “Дарё”га билдиришича, ҳолат Тошкент шаҳар прокурори Эркин Йўлдошев назоратига олинган.
Изоҳ (0)