НАТО бош котиби Йенс Столтенберг Украинага Россиядаги ҳарбий нишонларга ҳужум қилиш учун Ғарб қуролларидан фойдаланишга рухсат бериш кераклигини айтди. Бу ҳақда у The Economist нашрига берган интервьюсида маълум қилди.
Иттифоқчилар Украинага берилган қуроллардан фойдаланишга қўйилган баъзи чекловларни олиб ташлаши кераклигини ўйлаб кўриш вақти келди. Айниқса, ҳозирда жангларнинг аксарияти Харьков вилоятида, чегарадан унчалик узоқ бўлмаган жойда содир бўлмоқда. Украинани ушбу қуролларни Россиядаги қонуний ҳарбий нишонларга қарши қўллаш имкониятидан маҳрум қилиш унинг ўзини ўзи мудофаа қилишига катта халақит беради, — деди Столтенберг.
Унинг фикрича, рус қўшинларининг Харьков вилоятидаги ҳужуми муваффақиятга олиб келмайди.
Руслар катта йўқотишларга дучор бўлган ҳолда босим қилишда ва кичик муваффақиятларга эришишда давом этади, — дейди НАТО бош котиби.
Столтенберг иттифоқчилар Украинага “бир миллион артиллерия ўқлари” ваъда қилиб, буни амалга оширмаганидан ҳайратланди.
Бу нима эканини эслашимиз керак, бу Россиянинг Украинага қарши агрессив урушидир. Украина ўзини ҳимоя қилишга ҳақли. Бу Россия ҳудудидаги нишонларга зарба беришни ҳам ўз ичига олади, — деди НАТО бош котиби.
У мазкур уруш Россия ва альянс ўртасидаги кенг кўламли урушга айланиб кетишининг олдини олиш кераклигини билдирди. Столтенбергнинг таъкидлашича, НАТО қўшинлари альянсга аъзо бўлган давлатлар ҳудудидан ёки Украина ҳудудидан урушда қатнашишни режалаштирмайди.
Биз Украинага НАТО қуруқлик қўшинларини юбориш ниятимиз йўқ, чунки мақсадимиз Украинани қўллаб-қувватлаш, шунингдек, бу кенг кўламли конфликтга айланиб кетмаслигини таъминлаш, — таъкидлади альянс бош котиби.
Изоҳ (0)