“Дарё” интернет нашри томонидан эълон қилинган қисқа ҳикоялар танлови давом этмоқда.
Обуначиларимиз мазкур танловда фаол иштирок этаётганини алоҳида таъкидлаш керак. Машҳур журналистлардан тортиб мактаб ўқувчиларигача ҳикоя жўнатмоқда.
Фақат бир муҳим эслатма: танловга фақат ўзингиз ёзган оригинал ҳикояларни юборинг! Бошқаларнинг ҳикояларидан кўчирилган ёки турли тиллардан таржима қилинган ҳикоялар қабул қилинмайди.
Қуйида таҳририятимизга келган баъзи ҳикояларни эълон қиламиз.
Сурат
Оилавий фотоальбомдаги суратларни бирма-бир кўриб чиқаётгандим, тахминан 1 ёшлардаги болага кўзим тушди. Бу болакайнинг қаеридир менга, қаеридир укаларимга ўхшаб кетарди. Айнан қайси биримизнинг ёшлигимиз эканини ойимдан сўраш ниятида уларга ушбу суратни кўрсатгандим, йиғлаб юбордилар. Альбомда боланинг бошқа сурати йўқ эди.
Абдуқаҳҳорова Фарангиз, Тошкент
Дам
Жамшид бақириб гапирар, пиёла билан бошимга солиб юборай дерди.
— Худо бор, буни инкор қиладиган ким бўлибсан?!
— Хўп. Унда нега намоз ўқимайсан?
— Сенга нима? Даҳрийсан-ку сен!
— Жаннатга тушиш учун даҳрий эмасликнинг ўзи етарлими?
Ош ҳам заҳар бўлди.
Икки кун ўтгач ичкиликлар дўкони ёнида учрашиб қолдик. Ароққа кирган экан. Мени кўриб, ўзича уялди.
— Дам олай дегандим…
— Динданми?
Раҳматилло Турдалиев, Наманган
Тасодиф
— Менга ҳеч ким билан юрмаган, ҳаёли-иболи қиз керак! — деди йигит аммаларига. Қиз ҳам дарров топила қолди. У ҳам биров билан юрмаган мўмингина йигитни кутиб юрган экан.
Улар учрашувга чиқишди.
— Сиз?! — деди иккиси ҳам баравар.
Нодира Иброҳимова
Ота
У учинчи қизининг ҳам контрактга ўқишга кирганини эшитди ва меҳнатда қаварган қўлларига қаради:
— Ўқитаман!!! — деди ўзига ўзи пичирлаб...
Асенбаэва Дилафруз, Қорақалпоғистон Республикаси
Муддат
— Мен... Мен шуни айтмоқчи эдимки, мен сени севаман! Менга турмушга чиқасанми..?
— ...
— Алло? Эшитяпсанми?
— Мен ўйлаб кўришим керак...
— Майли, бемалол, мен гўшакни қўймай тураман...
Муҳаммаджон Юсупов
Умид
— Онажон, сочимни олдирсак, тез соғаяманми?
— ...Ҳа... болам...
— Дадам келгунларича ўсса бўлди сочим. Бантик олиб бераман дегандилар...
Лазиз Салимов, Навоий вилояти
* * *
Танлов 30 май санасига қадар давом этади. Ўз ҳикояларингизни @daryo_hikoyalar_bot орқали жўнатинг.
Танлов сўнггида таҳририят томонидан танлаб олинган ҳикоялар овозга қўйилади ва сайт обуначилари томонидан энг кўп овоз тўплаган ҳикоя муаллифлари ғолиб деб топилади.
Ғолибларга “Дарё” интернет нашрининг ҳамкори бўлган Асахий интернет дўкони томонидан тақдим қилинган совғалар топширилади.
1-ўринга — 30 та китоб
2-ўринга — 20 та китоб
3-ўринга — 10 та китоб
Асахий интернет дўконида сотувда бўлган китоблар билан қуйидаги ҳавола орқали танишиш мумкин.
Изоҳ (0)