“ ‘Кўк жигули’ қўшиғига алоқам йўқ” — Ҳамдам Собиров “Манго”нинг тикланмаслиги ва унга тақлид қилаётганларга муносабат билдирди (фото, видео)

Ёшлар орасида қўшиқлари оммалашиб бораётган хонанда Ҳамдам Собиров навбатдаги концерт дастурини “Ҳумо арена”да ўтказди. “Дарё” мухбирлари саҳна ва унинг ортидаги қизиқарли жараёнлар ҳақида репортаж тайёрлади. Бундан ташқари, хонанда мухлисларни қизиқтирган баъзи саволларга ҳам жавоб бериб ўтди.

— “Манго” гуруҳи қайта тикланиши мумкинми?

— Бу гуруҳ ёшлигимиз, саҳнага энди чиққан пайтларимизни эслатади. Гуруҳ таркибида бўлган дўстларимни яхши кўраман. Уларга оилавий бахт ва омад тилайман. Аммо ҳаммамизнинг ёшимиз улғайиб қолди, оилали ва фарзандлик бўлдик. Шунинг учун гуруҳ энди қайта тикланмайди, деб ўйлайман.

— Гуруҳдан ажралганингиз сизга омад олиб келди, деб ҳисоблайсизми?

— Ҳеч қачон бундай деб ҳисобламаганман. Чунки “Монго” гуруҳи ҳам элимиз назарида бўлган, унинг ҳам ўзига яраша мухлислари, ўзига яраша ютуқлари бўлган.

— Ҳамдам Собировнинг услуби шоу-бизнес вакиллари орасида оммалашди. Йўналишингиз қачондир ўзгариши мумкинми?

— Албатта мумкин. Лекин аниқ айтоламан, замонавий бўлмайди. Ўша эскича дейилаётган қўшиқлар, рақслар халқимиз қалбига анча яқин. Буни ҳам қайсидир маънода миллийлик десак бўлади. Замонавий мусиқаларни 10 фоиз одам эшитиши мумкин, аммо миллий қўшиқнинг мухлислари анча кўп. Шу боис қачондир стилимни ўзгартирсам ҳам у замонавий бўлмайди.

— Нега концерт бериш учун “Ҳумо арена”ни танладингиз?

— (кулиб) Мухлисларим озми-кўплигини билиш учун. Албатта, бу ҳазил. Билмадим, негадир “Ҳумо арена”да концерт бергимиз келди. Бир неча кун концерт беришга вақтимиз йўқлиги учун ҳамма мухлисларни битта концертга таклиф этишни хоҳладик.

— “Кўк жигули” қўшиғини Озода Нурсаидовага совға қилганингиз ростми?

— Йўқ, бу қўшиқнинг муаллифи Озода Нурсаидованинг ўзи. Унга ҳеч қандай алоқам йўқ. Аммо кўпчилик бу қўшиқни мен ёзиб берганман деб ўйлаган экан. Балки йўналиши ўхшашдир.

— Кейинги пайтларда шоу-бизнесда Ҳамдам Собировга ўхшашлар кўпайиб бормоқда. Бунга муносабатингиз қандай?

— Ажойиб, майли карвон кўп ризқи бўлак. Халқимиз кўнглидан жой олишларини истайман. Бирорта санъаткорга нисбатан кўнглимда адоват йўқ. Халқнинг ишончини оқласам бўлди, санъаткорлар билан рақобатлашишни истамайман.

Агар хонанданинг концерт дастурига ташриф буюролмаган бўлсангиз, албатта YouTube’даги махсус репортажимизни томоша қилинг.