Халқаро жиноий суд 24 май куни Исроил ҳукуматига Рафаҳда ўтказилаётган ҳарбий операцияни зудлик билан тўхтатишни буюрди. Бу ҳақда суд матбуот хизмати тарқатган маълумотга асосланиб, CNN нашри хабар берди.
Жиноий суд президенти Наваф Салом буйруқ чиқарилганини расман маълум қилган. Унда Исроил ҳукуматидан Рафаҳдаги ҳар қандай хатти-ҳаракатни тўхтатиш талаб қилинади.
“Исроил зудлик билан Рафаҳдаги ҳарбий ҳужумини ва Ғазодаги Фаластин гуруҳини жисмоний йўқ қилишга олиб келиши мумкин бўлган ҳаётий шароитларни келтириб чиқарадиган ҳар қандай бошқа ҳаракатларини тўхтатиши керак”, — дейилган Халқаро жиноий суд баёнотида.
Суд Рафаҳдаги гуманитар вазиятни “ҳалокатли” деб атаган. Агар Исроилнинг Рафаҳдаги операцияси давом этса, вазият янада ҳам кучайишига олиб келишини билдирган.
Исроил халқаро ҳамжамият, жумладан АҚШнинг огоҳлантиришига қарамай, 7 май куни Рафаҳга ҳужум бошлаган эди. Операция давомида Рафаҳнинг Миср билан чегара пункти эгаллаб олинган. Шу воқеадан бошлаб Ғазо жанубига гуманитар ёрдам кириши тўхтади.
Бундан аввал Халқаро жиноий суд Исроилга инсонпарварлик ёрдами учун Рафаҳ ўтказиш пунктини очишни буюрган эди. Исроил бу талабни бажармаган.
Халқаро жиноий суд қарорлари якуний ва мажбурийдир. Аммо ушбу суд тизимида қарорларни амалга ошириш механизми йўқ.
Аввалроқ Халқаро жиноий суд прокурори ҲАМАС етакчилари, шунингдек, Исроил бош вазири Биньямин Нетаньяху ва мудофаа вазири Йоав Галлантни уруш жиноятлари ва инсониятга қарши жиноятларда айблаб ҳибсга олиш учун ордер беришни сўрагани маълум қилинган эди.
Изоҳ (0)