Россия президенти Владимир Путин хавфсизлик ва тактик ядро қуроли бўйича режали машғулотлар масаласини муҳокама қилиш учун 23 май куни Беларусга борди. Бу ҳақда Кремль матбуот хизмати тарқатган хабарга асосланиб, The Moscow Times хабар берди.
Россия президентини Беларусь пойтахти Минскда Александр Лукашенко кутиб олган. Шундан сўнг раҳбарлар ёпиқ учрашув ўтказиш учун президент саройига борган.
Май ойи бошида Владимир Путин россиялик ҳарбийларга Ғарбнинг “таҳдид ва провокацияларига” жавобан тактик ядро қуроли машқларини ўтказишни буюрган эди. Кейинчалик ушбу машқлар Беларусь билан ҳамкорликда амалга оширилиши билдирилган.
Ўтган йили Беларусь ҳукумати ўз ҳудудида Россиянинг тактик ядро каллакларини жойлаштиришга хайрихоҳлигини маълум қилган эди.
Шу ҳафта бошида Россия Мудофаа вазирлиги ўзининг Жанубий ҳарбий округида ўқув машғулотларининг биринчи босқичи ўтказилишини эълон қилган. Машғулотлар Украинанинг Россия назорати остидаги ҳудудларида ҳам амалга оширилиши айтилган.
“Машғулотларнинг иккинчи босқичи ҳарбий иттифоқчиларимиз ва беларуслик ҳамкасбларимизнинг бевосита иштирокида бўлади”, — деган Владимир Путин пайшанба куни Беларусь президенти Александр Лукашенко билан учрашувда.
Россия мудофаа вазири этиб тайинланган Андрей Белоусов ҳам музокаралар доирасида Минскка жўнаб кетган. Белоусив Беларусь пойтахтида ҳамкасби Виктор Хренин билан учрашган.
Россия ва Беларусь раҳбарлари ўқув машғулотлари айнан қаерда ўтказилиши маълум қилмаган.
Изоҳ (0)