Танзаниядаги шакар заводида юз берган бахтсиз ҳодиса оқибатида 11 киши ҳалок бўлди

Танзаниядаги шакар ишлаб чиқариш заводида юз берган ҳалокат оқибатида 11 нафар фуқаро ҳалок бўлди. Бу ҳақда Reuters нашри хабар берди.

Манбада айтилишича, ҳалок бўлган шахсларнинг 8 нафари мамлакат фуқароларидир. 3 нафар қурбон эса хориждан келиб ишлаётган бўлган.

Ҳолат Морогоро вилояти марказида жойлашган хусусий “Мтибва” шакар заводида юз берган. Бу ҳақда вилоят полицияси раҳбари Алекс Мкама хабар қилган.

Заводда кундузги танаффус пайтида портлаш юз берган. Танзаниянинг “Мвананчи” газетаси эса заводдаги йирик қувурлардан бири портлаганини ёзган. Ҳодиса тафсилотлари ўрганилмоқда.

Ҳалок бўлганлар жасадлари Додомадаги марказий шифохонага келтирилган. Шунингдек, 2 нафар ярадор ҳам шу жойга олиб келинган. Вафот этган фуқаролар орасида бразилиялик, кениялик ва ҳиндистонлик шахслар борлиги айтилган.

Экспертлар гуруҳи авария сабабларини ўрганиши ва қўшимча маълумотларни тақдим этиши кутилмоқда.

“Мтибва” шакар заводи Шарқий Африка давлатидаги энг муҳим шакар заводларидан бири ҳисобланади. Завод йилига ўртача 70 000 метрик тонна шакар ишлаб чиқаради. Мамлакатнинг шакарга бўлган йиллик талаби 460 минг тоннадан ортиқ бўлиб, завод бу талабнинг 7 дан бир қисмини қоплаши маълум қилинган.