Польша икки давлат чегаралари яқинида Украина ҳаво ҳудудини ҳимоя қилиш учун Россиядан учирилган ракеталарни уриб туширмоқчи. Бу ҳақда Польша Ташқи ишлар вазирлиги спикери Павел Вронский хабар берди.
Ҳозирда Польша ҳаво ҳужумидан мудофаа тизимларидан фойдаланиш имкониятини кўриб чиқмоқда. Бу борада якуний қарор қабул қилингани йўқ.
“Бу масала ҳуқуқий ва техник нуқтайи назардан кўриб чиқилмоқда, аммо бу иш бўйича қарорлар йўқ”, — деди Вронский.
У Украина томони Польша расмийларига шундай сўров билан чиққанини айтди. Польша Ташқи ишлар вазирлиги спикери бу имкониятни халқаро ҳуқуқ бўйича экспертлар ва техник мутахассислар баҳолаши кераклигини билдирди.
Вронскийнинг таъкидлашича, ҳаво ҳужумидан мудофаа тизимларини Украинага бериш ҳақида гап кетмаяпти, чунки бундай имконият мавжуд эмас. Россия ракеталарини йўқ қилиш учун ҳаво ҳужумидан мудофаа тизимларини қўллаш муҳокамаси 24 мартдан кейин бошланган. Ўшанда Польша Россия ракетаси мамлакат ҳаво ҳудудини бузганини эълон қилган.
Эслатиб ўтамиз, 20 май куни Украина президенти Владимир Зеленский НАТО давлатларини Украинага Россия ракеталарини уриб туширишда ёрдам беришга, Россияга ҳужумларда Ғарб техникасидан фойдаланишга рухсат беришга чақирганди.
Изоҳ (0)